Ինչո՞ւ է աշնանն այդքան անհրաժեշտ պիլինգը:
Այն, ինչ արեւը, կեղտոտ օդը կամ սխալ սննդակարգը, քրոնիկ բորբոքումները հասցրել են մաշկին, պետք է վերականգնել հիմնականում աշնանը եւ ձմռանը: Գոյություն ունի մեխանիկական պիլինգ, երբ սկրաբով են հանում վնասված մաշկը: Նախընտրելի է, որ այն լինի մանր, որպեսզի չվնասի մաշկը: Ի դեպ, այն ինքնուրույն էլ կարելի է պատրաստել: Օրինակ՝ սուրճը աղալ խոշոր հատիկների, խառնել ձիթապտղի ձեթի հետ եւ մերսելով քսել մաշկին: Նմանատիպ սկրաբ կարելի է պատրաստել նաեւ ծովի աղը խառնելով ձիթապտղի ձեթի հետ: Կա նաեւ ֆերմենտատիվ (էնզիմային) պիլինգ, օրինակ լոռամրգով (клюква) կամ նռան հատիկներով: Նույնպես պետք է մերսելով քսել դեմքին, պահել 20 րոպե եւ լվանալ:
Քիմիկական պիլինգներն ավելի լուրջ են: Պրոցեդուրան արվում է տարբեր տոկոսայնությամբ թթուներով, որոնք քայքայում են մաշկի չորացած եւ վնասված շերտերը, որոնք երեք օրվա ընթացքում շերտազատվում եւ դուրս են գալիս: Մաշկը դառնում է ավելի թարմ, առողջ, առանց պիգմենտների:
Քիմիական պիլինգներից առանձնանում է, այսպես կոչված, դեղին պիլինգը, որն ավելի կանխատեսելի է: Այս պիլինգի ժամանակ արդյունքը հստակ է, իսկ մյուս թթուների դեպքում դու երբեք չես կարող իմանալ, թե այն որքան կխորանա, հետեւաբար՝ պացիենտին միշտ պետք է զգուշացնել, որ հնարավոր է՝ դեմքը մի քիչ կարմրի, տեղ-տեղ վերքեր առաջանան եւ այլն:
Ե՞րբ է պետք նախապատրաստվել քիմիական պիլինգին:
Իրավունք չունես խորը պիլինգ անել, եթե մաշկը նախապես չես պատրաստել: Ցանկացած լուրջ պիլինգից առաջ առնվազն 1-2 ամիս դու պետք է մաշկի բոլոր ֆունկցիաները վերականգնես, պետք է նշանակվի ճիշտ խնամք, որը կարթնացնի մաշկի բոլոր բջիջները, հակառակ դեպքում՝ արդյունքը դրական չի լինի:
Տարվա ընթացքում քանի՞ անգամ կարելի է քիմիական պիլինգ անել:
Քիմիական պիլինգ կարելի է անել տարին երկու անգամ՝ աշնանը եւ ձմռանը, բայց եթե խոսքը գնում է հաստ պիգմենտի, ատրոֆիկ սպիների մասին, մեկ պիլինգը ոչինչ չի տա: